ح تترشح ؟!!
ح تترشح أكيد طبعاً ح تترشح
و آلاف من لصوص حزبك
ح تطالبك لتترشح
و تترشح ,
و معاك الشعب يترنح
و حال سودانك الطيب
يعاني دوار ويتشرشح
فقد طعم العذوبة زمان
و كيف يسعد ؟
و كيف يفرح ؟
و انت جعلت من البلد مسرح !
تنطط فيهو بي كيفك
و ترقص ما بهمك شيء
بتسافر و تتفسح
ورغم جنوبنا راح منك
بتخرج انت كل صباح
تقول .. تشرح
بأن بلادنا في نعمة
و حال سودانا صار أوضح
لأنك انت أنقذتو
و علمتو .. وأطعمتو
و انت كسيتو من كسبك
و أنت حميتو من كل الذي يجنح
بتترشح ..
بعد ربع القرن يا زول ؟
ايه قدمت ..
بركاتك ؟
مد ايدك .. عشان بي الفيها نتمسح
يمكن حالنا يتصلح
نفارق الفقر والضيق
و يرجع لينا حالنا الكان
قبل جيتك .. قبل انقاذك المشؤوم
قبل كذب الذي يسرق ..
يخرج فينا ..
يقرأ علينا سورة التين و ألم نشرح
بتترشح ؟!
وين مشروعك الهمام ؟
بناكل نحنا من زرعك
و نحلب نحنا من ضرعك
و نلبس من مصانعنا ..
كذبتا علينا ..
بس غادر ..
ولغيرك مكان أفسح ...
ليست هناك تعليقات:
إرسال تعليق