فينا كبّر 

فينا كبّر ..

وفينا هلّل ..

وكم دعانا ..

عشان نصلي ,

ونذكر المولى ونسبِّح ..

وما نعيش في الدنيا نغفل

ثم نعرف ..

-       ويا عجايب الدنيا فينا –

انو لص ..

لابس ثياب شيخاً مبجَّل

و انو لازم ..

يتبع القول المخوَّل

من حكومة سوء عجيبة ..

و انو لازم يتحلل

من فلوس الشعب ..

ويبقي للباقي المُفضِل

وديا كلو عشان ..

يؤمن على الجاي

عليه مُقبِل

فينا كبّر ..

وفينا هلّل ..

وألف لعنة ,

على بشر ..

تبخس حقوق حُكّاما

تستغرب على راغب التحلل

فكم خدم ليلو ونهارو ..

وكم تعذَّب ..

وضحّى بي نفسو وتبهدل

ثم يظهر في صحفنا ..

زول مغفَّل

ينتقد حق الوزير ..

في مال وزارتو ..

و انو كيف ينهب ..

ويظهر يتحلل

فينا كبّر ..

وفينا هلّل ..

ثم قال بكل صراحة ..

انو تنهب وتبقى معروف ..

بالتحلل

شيئاً أفضل ..

لص ومعروف بالتحلل

هو أحسن من حرامي ..

يسرق الشعب بالتخفي ..

و بي كلام مرشوش معسَّل

فينا كبّر ..

وفينا هلّل ..

ووضح القول بي صراحة

انو نحنا ..

جماعة أخمش ..

وأجعل الفاضح ومخفَّى ..

ثم أخرج في ثياب شيخاً..

مُفَضّل ..

وأفتح الأبواب ..

على التقوى وثيابا ..

في غيابك ..

من عيون الناس..

 تعلَّق ..

بي غراب فعلاً مضلل

فينا كبر ..

وفينا هلل ..

ومن حقوق الناس تحلل

ربك الغفار بيعفو ..

وكم بيغفر للفواحش ..

وللي صاب الدم وقتّل

الصحيح ربك بيعفو ..

والصحيح ربك بيغفر ..

إلا انو ..

ما دعاك لفعل سيء ..

وما دعاك للسرقة تفعل

وثم تخرج ..

فينا في أقبح عجيبة ..

انو تعلن للتحلل

وليعرف الوالي وجماعته ..

انو جثمان المسجى ..

بعد موتو ودفنو ..

يبقى يتعفن , يدوِّد..

يتحلل ..